早於 Ultraventure 4 推出市面前，越野跑教練黃偉雄已經預先測試呢款新型號山鞋。經過100K嘅恆常訓練後，偉雄教練為各位對 Ultraventure 4 有興趣嘅跑友同山友送上以下評測︰ Hello 大家好我係偉雄，係 Topo Athletic 嘅長期用家。今次試嘅 Ultraventure 4 繼承咗第三代嘅優良傳統，並喺貼合度及性能上有顯著提升。呢款鞋舒適度方面嘅表現係幾令人印象深刻，新鞋面設計提供嘅鎖定比上代更穩固，Topo 經典嘅鞋頭設計為前腳掌提供寬敞空間，符合晒人體工學。而中足同鞋跟則保持良好支撐，令佢喺長距離越野跑中既穩定又具支撐性。 我著住 Ultraventure 4 跑咗 100 公里越野路段後，對佢嘅舒適性有更深入體會。整體嘅緩衝性令我覺得我喺崎嶇地形上依然份外輕鬆，長時間上山訓練亦唔會覺得雙腳太攰。即使需要快速變換方向及步伐嘅路段，呢對鞋依然能夠提供穩定支撐，令我無需擔心受傷風險。 重量方面，Ultraventure 4 約為 289 g（我著US9號），以厚底鞋嚟講相當輕便。輕量設計令 Ultraventure 4 更加靈活，無論係步行或跑步，都能保持一定速度。中底採用嘅 Zip Foam 材料，喺柔軟性及能量回饋之間取得良好平衡，提供輕盈而通透嘅跑感，擁有足夠緩衝同時唔會過於柔軟。其搖擺設計 (rocker design) 令 Ultraventure 4 喺每步離地期間過渡非常順暢，進一步提升跑手嘅效率。 Vibram XS Trek 大底喺各種地面上提供可靠抓地力，4.5mm 鞋釘喺香港山徑大部分路況下表現良好，但濕滑石頭或極端崎嶇條件下，抓地力可能稍顯不足。如果你計劃喺非常技術性嘅路況下跑步，建議考慮選擇 MTN Racer 3/ Terraventure 4/ Pursuit 2/ Traverse 以獲得更強抓地力。 總括而言，Ultraventure 4 係一款多功能越野鞋，喺輕量化設計同緩衝性之間取得完美平衡，尤其適合需要一對可靠又舒適山鞋嘅跑者。無論係長距離跑者或者偶爾上山嘅健行人士，Ultraventure 4 都係理想選擇。